Jam 4 | KMG | STEP | Ŋoŋerao šika â rârâsi foekac i fuŋne weniŋucte? Me sahac-ŋeŋicko andac forakac izi hâcne šika gie baekac.

James 4

Harac gie bahuc fârine mi bâbâfua

1 Ŋoŋerao šika â rârâsi foekac i fuŋne weniŋucte? Me sahac-ŋeŋicko andac forakac izi hâcne šika gie baekac. 2 Ŋoŋe andac eipiehuc wiac mi rauckeeŋgopieŋ. Ŋoŋe qaqac â iiŋguuŋ eec ehuc sifu wiac sâcne mi hotâckeeŋgopieŋ. Ŋoŋe kikisâ â kikisuec ehuc wiac sâcne mi hure nâc eeŋgopieŋ. I nunumu tâmiric jueŋgopieŋ irec. 3 Moc i numu-bipiehuc wiac mi roeŋgopieŋ, ine maŋŋeŋicko dâŋ sâqocne šiŋuc foha numueŋgopieŋte: “Wiac fua-nâreme samarierâ andac-nâŋecte fârine bâfuanšepeneŋ.”

Maŋnâŋeczi ra fo ware fo mi ezejec

4 Oi, šâšâfic hehetâc ŋic ŋoŋe¡ Mâreŋko wiac fokac irec biŋe juocmuzi Anutu râpeckeocmu, i mi manaŋgopieŋ me? Irec moc e mâreŋkopec wiac kosa âgo ecneocmuzi Anutu kisâ ecneocmu. 5 Me dâŋqâreŋ kecšiŋuc fokac i ŋoŋe manapie racne eekac me? “Maŋnâŋecko mâro ŋewec i ere biŋe sawa juocte šoɋac sâko eekac.” 6 Erâ ŋifec ine aki anonoc wemo afecne sicne-nâreekac. Irec dâŋqâreŋ hâcne kecšiŋuc fokac: “Anutu e ŋic maŋfefe dope qatara-jareekac, ŋic maŋhuhuŋ ine aki anonoc sicne-jareekac.” 7 Irec ŋoŋe Anuture rurumaŋko raširâ domanšepieŋ. Ehuc Sataŋ bâsuenšepieŋ, eme behec-ŋoparâ wiseocmu. 8 Ŋoŋe Anutu maickepie eki wâc maic-ŋopaocmu. Sâqocne bapa, maŋŋeŋic ra qa ware qa eekac, ŋoŋe meŋeŋic šurerâ maŋŋeŋic baɋaɋackenšepieŋ. 9 Ŋoŋe fuŋne-ŋeŋic mana tararâ ki busâqoc enšepieŋ. Gâgâwi-ŋeŋiczi rirehame busâqoc fuazejec, â šeri-ŋeŋiczi rirehame ki mamakuc fuazejec. 10 Wofuŋte maio maŋhuhuŋ jupie eki bafaharec-ŋopaocmu.

Wofuŋ mi âkehockezo

11 Âgofâc-nane, ŋoŋe mumusâqoc mi enšepieŋ. Moc e âgo-ticne musâqorerâ okacne dâŋko râeocmu, e sâcmutâc dâŋ musâqorehuc hetâtieocmu. Go ine sâcmutâc dâŋ hetâtiecmuo rereŋŋic mi ehuc mumutara ŋic ecmu. 12 Sâcmutâc dâŋ irec mumufua â soŋaŋ mocjaha sawa jukac, aakic â bebehe irec gie ekizia baocmu. Go ine wemogezi âgoge okacne dâŋko râecmu?

Wofuŋzi mana-nâreme wiac enaŋmu

13 Ajoc, moc ši mananiŋ. ŋoŋe kecšiŋuc mueŋgopieŋ: Miŋecgac me tomâcko hae ira ra moneŋ mafa hurehuc juhapene jara moc tarame risienšepeneŋ.” 14 Oi ŋoŋe, tomâcko wiac iŋuc me iŋuc fuaocmu, i moc manaeŋgopieŋ? Me juju-ŋeŋic i weniŋucne? I rombâŋ iŋucne, fua fuahuc izia qašueekac. 15 Irec ŋoŋe kecšiŋuc mupie sâckeocmu: “Wofuŋzi mana-nâreme ɋâricne juhuc iŋuc me iŋuc enšepeneŋ.” 16 Ŋoŋe ine pacgoroŋ dâŋ boc muhuc sahac-ŋeŋic bafeeŋgopieŋ. Pacgoroŋ dâŋ i wiac sâqocne. 17 Ŋic moc e wiac biaŋne eocte mana tarahuc sifu qikiŋneekac, e bahac bâfuakac muzo.